عارفة عبد الرسول: أنا جاية من جيل المايوهات والبوس في مجالنا عادي (فيديو)

علقت الفنانة عارفة عبد الرسول، خلال لقاء تليفزيوني، على صورتها المثيرة للجدل والتي ظهرت فيها مرتدية المايوه.

وقالت عارفة عبد الرسول خلال لقائها ببرنامج "كلام الناس" الذي تقدمه الإعلامية ياسمين عز بقناة "إم بي سي مصر": "أنا بطبيعتي إسكندرانية ولازم ننزل البحر كل صيف، ولو عدى صيف وما نزلتش البحر ممكن يجيلي اكتئاب، وصورة المايوه أنا ما كنتش نزلت البحر خالص، وكان عندي شغل كتير فجماعة أصحابي خطفوني وراحوا بيَّ العين السخنة، وكنت فرحانة أوي بالبحر ونزلت الصورة وأنا في منتهى السعادة واللي باين الكتف.

وتابعت: "لما نزلت صورة المايوه وكتبت لقيت الطبطبة، لقيتهم بيقولوا ليَّ يا ولية يا عجوزة اتلمي، وواحد بيقول لي أنتِ مش مكسوفة على دمك وأنتِ لابسة البكيني، أنت شوفت البكيني فين يا عم؟! مفيش بكيني أصلًا، فكان موضوع غريب، وقعدوا ينصحوني أشيل الصورة، فأنا كتبت منشور توضيحي أوضح بس ما مسحتهاش".

وأكملت عارفة عبد الرسول: "ما كنتش متوقعة الرد العنيف على صورة المايوه، وأنا أصلًا جاية من جيل مايوهات تصغر علينا، أبويا ينزل يجيب لنا مايوهات أكبر، وكنا نضحك على أي حد نازل البحر بجلابية أو تي شيريت وبنطلون، البحر يعني مايوه".

وعن علاقتها بزوجها، قالت: "أنا متجوزة من 44 سنة وطول فترة زواجنا كان فيه مشاكل وصعوبات وكفاح، واتجوزنا عن حب وبنحب التمثيل، ولما اتخرجنا اشتغلنا في المسرح، وكان فيه بيننا خناقات، ولكن في النهاية بنتصالح بفنجان قهوة، ومفيش ما بيننا غيرة، ولو شاف واحدة حلوة بقول له فعلًا حلوة وجميلة، وبعدين احنا في مجال فني؛ نسلم ونبوس بعض عادي، ولكن ما ينفعش نطول في النظرة ولا السلام لإني بحس ساعتها إن فيه حاجة غلط".