الهام شاهين: الكرباج علم على جسد منة شلبي.. وطلبت مني أضربها بجد

كشفت الفنانة إلهام شاهين كواليس مشهد ضرب وتعذيب منة شلبي، بالحلقة 13 في مسلسل بطلوع الروح، مشيرة إلى أن التعذيب كان حقيقيًا.

وقالت إلهام شاهين : منة شلبي جسمها علم من أثار الكرباج، وهي اللي طلبت أضربها بجد، عشان يطلع المشهد حقيقي، وبقيت أقولها الكرباج جامد وهيعلم، قالتلي ملكيش دعوة، إحنا لازم نعمل المشهد صح، وفعلا عملت كدا، وتاني يوم جابوا كريمات والكرباج علم على جسمها.

وواصلت إلهام شاهين: ده من أهم المشاهد لينا في المسلسل، والحلقة 13 من أقوى الحلقات، لأن كم العنف كبير، ومشهد القتل بالرصاص من المشاهد المؤثرة جدا، والحلقة تقيلة أوي، وكمان نهاية الحلقة مع عمر، وأنا بهزقه، عشان بياخد روح وساب أم جهاد والحرقة والوجع الرهيب اللي كانت فيه.

وأضافت إلهام شاهين: والحلقة كلها مشاهد قوية، مفيش مشهد بسيط، وكلها متعبة لكل الناس اللي بتتفرج، واللي بيمثل، وجاتلي تعليقات من ساعة ما نزلت الحلقة؛ لأن الناس تأثرت بيها.