الهام شاهين: كل أدواري لها رسالة حتى المنحرفة

ردت الفنانة الهام شاهين، على الهجوم الذي تعرضت له بعد عرض أفيش مسلسلها الرمضاني "بطلوع الروح" إخراج المخرجة كاملة أبو ذكري.

وقالت الفنانة إلهام شاهين "نعدكم بعمل محترم يحترم فكر الناس وعمل ذو قيمة وأشكر المخرجة الكبيرة كاملة أبو ذكري، وهيبقى من الأدوار المؤثرة جدا في حياتي".

وتابعت: "بقول للناس اللي بتهاجمني هو الأفيش عملكم رعب وقد كده خايفين من فضح تطرفكم وإرهابكم وأعمالكم القذرة".

وأضافت: "احنا ندافع عن الإسلام وكنت مفكرة إن الناس هتشكرني لأني بدافع عن الدين الإسلامي، واللي يهاجم المسلسل يعمل مع داعش ذلك التنظيم الذي يسيء للإسلام".

ولفتت: "الزي اللي لبسته في “بطلوع الروح” مش من اختارعنا دا لبس الداعشيات، وما حدش يقول لي إزاي بتلبسي لا اله الا الله على راسك وبتقتلي هو ده حال الدواعش والداعشيات".

وأكملت: "احنا بنحاول ننقذ الشباب والشابات اللي بيتعملهم غسيل مخ فاحنا بنفوقهم ويبعدوا عن الناس اللي بيتاجروا بالدين، وقناة الجزيرة بدأت تشتغل عليا تاني وبقول اللى علي الجزيرة يا ريتك تنفعل على الإسلام ولما خدوا الطيار الأردني الى حرقوه والمسيحيين المصريين في ليبيا اللى ذبحوهم ولما خربوا ليبيا والعراق وسوريا، كنت فين".

 واستطردت: "كل أدواري لها رسالات مهمة حتى الدور المنحرف له رسالة مهمة، أول لما يكشف الفن فضائحهم وفظائعهم يقوموا يهاجموني".

ولفتت:"في المسلسل عايزة أقول إن ده مش الإسلام، وأنا مؤمنة برسالتي وشايفة إنها رسالة مهمة وعمري ما خفت من أي حاجة وأنا بدافع عن ديني ووطني وانتمائي والأمة العربية، ونفسي المنفعلين ينفعلوا عن الصورة الحقيقية، إزاي تعتبروا الجماعات المتطرفة تعبر عن الإسلام، ومفيش دين أبدًا يحض على الإرهاب والتطرف".