عادل الفار عن وفاة ابنه الوحيد: زعلان أوي إني مسلمتش عليه قبل ما يموت|فيديو

كشف الفنان عادل الفار، تفاصيل معاناته أثناء مرضه وموت ابنه الوحيد، قائلا: "سنة 2021 جاتلي غيبوبة كبد واتحجزت في العناية المركزة".

وتابع خلال لقائه ببرنامج "واحد من الناس" الذي يقدمه الإعلامي عمرو الليثي بقناة "الحياة": "فجأة لقيت نفسي مبجمعش الكلام وتايه لغاية لما بنتي ومراتي صمموا إني أروح المستشفى ولما روحت في غيبوبة خدوني المستشفى وقعدت أسبوعين محجوز وعملولي تحاليل وأشعات وعملت عملية جراحية".

وأضاف: "خلال فترة مرضي ابني شادي عادل الفار كان بيطلب من الجمهور يدعيلي بالشفاء، وفي يوم 10 فبراير بعد سنة من مرضي انتقل إلى رحمة الله وتوفى وبقيت أنا اللي بدعي له بالرحمة وبقرأ له الفاتحة وبدعي للناس يدعوله".

سر حزن عادل الفار من ابنه قبل وفاته

واستطرد: "خبر وفاة ابني شادي كان مؤلم جدا، هو تعب أوي وأنا كنت قاعد في القهوة مع أصحابي ومراتي خدته وراحت المستشفى وأنا كنت زعلان منه في الفترة دي ومتغاظ علشان مكنش بيسمع كلامي وبيشرب سجاير كتير، والدته أخدته المستشفى فروحت علي المستشفى شوفته جاي من بعيد ومقعدينه على العجلة اللي بتمشي وكنت متضايق منه أوي وتاني يوم عرفت إنه مات وأنا مسلمتش عليه قبل ما يموت واتأثرت جدا لإنه كان حبيبي وغاوي فن".

اللحظات الأخيرة لوفاة ابن عادل الفار

وأكد: "المستشفى اللي شادي ابني مات فيها، وأنا كنت مقعد المساعد بتاعي معاه يشوف هو عايز إيه ويعملهوله وبعدين بلغني تاني يوم إنه مات، مش قادر أنسى صورته الأخيرة وهو متوفى وطول الوقت لما افتكره ببقى عايز أعيط لإنه ابني الوحيد، ومعنديش دلوقتي غير بنتي وهي اتجوزت وسافرت مع جوزها أمريكا".

إذا أعجبكِ هذا الموضوع إقرئي أيضًا : انهيار عمرو الليثي في البكاء على الهواء بسبب صورة (فيديو)