لبلبة: بكيت وقت تكريم عادل إمام.. هو بياخد قلبي وعشت معاه أكتر من أهلي

علقت الفنانة لبلبة، على تكريم الزعيم عادل إمام، في حفل توزيع جوائز Joy Awards، الذي أقيم في المملكة العربية السعودية، بجائزة زعيم الفن العربي.

لبلبة: بياخد قلبي وعشت معاه أكتر من أهلي

وقالت لبلبة في تصريحات تليفزيونية: بكيت وقت تكريم عادل إمام، لأنهم جابوا مقتطفات من أعماله، والعينين دي عينين الأستاذ عادل، تضحك وتبكي، يديكي البؤس والغلبان والفرحان، هو فعلًا زعيم الفن وحبيبنا، عادل إمام ياخد قلبي، ولما أشوفه أبقى حاسه إني شايفة الفن كله.

وأضافت: أنا وعادل إمام عشرة طويلة وعملنا آخر مسلسلين صاحب السعادة ومأمون وشركاه، أنا بعتبر كل مسلسل فيهم 5 أفلام، بنشتغل 7 شهور وكل يوم مع بعض وبناكل ونفكر ونمثل مع بعض، أنا عاشرت سينمائيين والأستاذ عادل إمام أكتر ما عشت مع أهلي في بيتي.

عادل إمام ولبلبة

وأردفت لبلبة: العشرة بيني وبين عادل كبيرة وبحس بيه وبعينيه وإمتى هيقول إيه، لا يمكن أبوظ له إفيه، وهو عارف أنا بحبه قد إيه وبخاف عليه قد إيه، وبعرف هو زعلان ولا مبسوط من مشيته في الطرقة بتاع الاستوديو.

أما عن النصحية التي وجهها لها الزعيم عادل إمام، فعلقت لبلبة، قائلة: وقت ما مرضت أمي ومرضها خد 16 سنة هو كان خايف عليا جدًا، وكنا تقريبًا حاسين أن مرضها صعب، فكان دايمًا بيسأل هو وعائلته مدام هالة زوجته، ولما ماما اتوفت مبقتش أكل وخسيت، ويوم العزاء قعد جمبي وقالي كلي علشان خسيتي وبقى شكلك يقرف الكلب، وطبعًا أنا ضحكت هو دمه خفيف.

إذا أعجبكِ هذا الموضوع إقرئي أيضًا : باسم يوسف يكشف تفاصيل مكالمة لا ينساها مع عادل إمام