سمية الخشاب تعبر عن تعبها بسبب كليب "أركب على الموجة"

كشفت الفنانة سمية الخشاب، عن كواليس تصوير أحدث كليباتها الغنائية "أركب على الموجة"، موضحة الصعوبات التي واجهتها خلال التصوير.

وقالت سمية الخشاب: "الأغنية فيها حاجات صعبة كتير وحاجات معمولة جرافيك بشكل متقن جدًا، وتصوير في درجة حرارة 40".

وأضافت: "لما المخرج يطلب مني حاجة معنديش فكرة أقول أنا تعبانة أو مش هعملها أو أستعين بدوبلير، عمري ما عملت كده".

وتابعت: "المخرج طلب مني أنط على الترامبولين، وآخر مرة عملت كده كان عمري 10 سنين، وعجبني الترامبولين وفضلت أنط علشان ياخد اللقطات المطلوبة، وبعدها فضلت أسبوعين متكسحة، كإني كنت بعيدة عن الرياضة سنتين ورجعت أتمرن".

تحدثت سمية الخشاب عن ردود الأفعال الإيجابية على عودتها للغناء قائلة: "أنا الكسل عندي مستواه عالي جدًا، لكن عندي ميزة أشكر ربنا عليها إني لو غبت سنين وطلعت بحاجة بتعمل نجاح كبير".

وأضافت: "السر بعد ربنا إني مش محروقة، ومش شغالة عمال على بطال والناس شايفاني ليل ونهار وزهقت من شكلي، لما تختفي وترجع مرة واحدة بيبقى لك طلة ووحشة".

أوضحت سمية الخشاب أنها لا تعتبر الفن مهنة قائلة: "الفن بالنسبة لي هواية بحبها، لو مهنة كنت هعتمد عليها واضطر أشتغل أي حاجة علشان أبقى موجودة وأنتشر ويبقى عندي مصدر دخل، وإن الناس تقول عني غايبة أحسن من إنهم يقولوا محروقة، أو أشتغل أعمال لا تنجح، لما أغيب وأرجع بحاجة محترمة أنا كده بحترم جمهوري".

إذا أعجبكِ هذا الموضوع إقرئي أيضًا : سمية الخشاب تثير الجدل بعد ظهورها بالمايوه في حمام السباحة