لأول مرة.. رامي جمال يكشف سرًا عنه

كشف المطرب والملحن رامي جمال، لأول مرة خلال لقائه مع الإعلامية أسما إبراهيم في برنامج "حبر سري" السبب وراء إصابته بمرض البهاق. 

أكد رامي أنه نام في يوم وهو حزين، وروى الموقف قائلًا " جيت في يوم سافرنا وصورنا أغنية من الأغاني المقربة أوي لقلبي مع مخرج صديق، والأغنية كانت تكلفتها كبيرة كانت 100 ألف دولار وبعد لما خلصنا تصوير عايز أستلم منه الكليب لقيته بيماطل ومختفي وفي الآخر اعترف لي إن الهارد وقع منه اتكسر وما كانش واخد منه نسخة". 

وتابع " الحركة اللي عملها معايا المخرج ما يغلطش فيها حد جديد في الشغلانة، ساعتها ما بقيتش قادر أصدق وفكرت وقلت يمكن عايز فلوس زيادة بس الحقيقة إن الهارد فعلًا بتاع الكليب اتكسر وقال لي اتصرف فطبعًا ما كانش عندي حل وأنا كنت في بداية مشواري والـ100 ألف دولار ما كانوش موجودين وربنا كرمنا بالحل في الفلوس بس كان الموضوع صعب جدا". 

أما عن أصعب موقف في حياته فقال " استشهاد صاحبي الأنتيم عمرو صلاح  وجمعنا 21 سنة صداقة وساكن معايا في نفس البيت ومع بعض ليل نهار واستشهد في الواحات، ودا كان بالنسبة لي صدمة كبيرة وحاولت أكتم بعدها ولكن جالي بعد شهر مرض السكر، وواضح إن الصدمات بتأثر فيا".

إذا أعجبكِ الموضوع اقرئي أيضًا رامي جمال يطرح أغنيته الجديدة "كلمة سلام" (فيديو)