علي الحجار لمدحت صالح: أنا أستاذك وما نتساواش ببعض | فيديو

علق الفنان علي الحجار على إمكانية صلحه مع الفنان مدحت صالح، بعد خلافهما على مشروع الأساتذة، الذي قدمه مدحت صالح على المسرح الكبير في دار الأوبرا المصرية، ويتهمه علي الحجار بسرقته، ويشير إلى أنه كان مشروعه الذي يعكف على تحضيراته منذ عام 2002 ويحمل اسم “100 سنة غنا”.

وقال علي الحجار خلال مداخلة هاتفية في برنامج "الستات" مع الإعلامية سهير جودة ومفيدة شيحة: مدحت صالح بالنسبة لي فنان كبير ومهم وأنا بحب منه أغاني كتير.. لكن فكرة 100 سنة غنا بتاعتي وهو عارف.. وهو بيطلع في برامج كتير بيقول علي الحجار أستاذي.. لدرجة إن في مرة منى الشاذلي بتقولي تحب يطلع مدحت صالح معاك.. قولتلها آه طبعًا.. وطلعنا وقال قدام كل الناس إنه كان بيقعد ورا السور عشان يتعلم مني وإني أستاذه.

وأضاف علي الحجار: مدحت عارف مشروعي وعارف إن الدراسة اللي عملتها هو ناقله بالظبط.. وطلعت في مرة قولت ده مع هالة سرحان.. واخد المشروع كوبي بيست.. ومن وجهة نظري المؤلف والملحن هما صانعي الأغنية والمغني هو مؤدي.. ياما مؤدي كويس أو مغني كويس أو مطرب.

وتابع علي الحجار: لما الدولة تهتم وتعرف إنه مشروع مهم.. بأرخ من سنة 19.. ده مشروع قومي.. احنا مش اتنين عيال صغيرة في الشارع واتخانقنا مع بعض.وبتصالحونا مع بعض.. الموضوع مش كده.. مدحت صالح من أول ما طلع بيغني لنفسه 5 أو 6 أغاني.. والباقي أغاني لمؤلفين وملحنين تانيين دي مش حاجة جديدة.. واللي عمله في الحفلة.. هي حفلته اللي عملها قبل كده.. مفيش جديد.. وقال هطور الأغاني واعمل توزيع معاصر.. ومفيش حاجة حصلت زي ما كان بيعمل طول عمره في حفلاته العادية.

وأردف علي: أنا مسمعتش مدحت صالح بيقول إن المشروع بتاعه وإنه من دماغه.. نفسي يطلع يقول.. واللي حصل امبارح من الوزيرة أرضاني.. إن المشروع بتاعي يتحقق واعرف احققه بالشكل فعلًا الناس تفهم إن ده مشروع وإن دي دراسة ويفيد الدولة بجد.

واستكمل علي الحجار حديثه: ولما بعتولي في الحوار الوطني من أسبوعين قولت إن الفنان المصري هو اللي أرخ لحضارة مصر بالمعابد والمسلات اللي كتب عليها.. الفن مش للمتعة بس والفن رسالة..أنا مش عايز اطلع اخد فلوس من الحفلات والرحلات وخلاص.. عندي هدف اسمى وكبير جدًا.. وأنا عيل عندي 22 سنة كنت بختار رباعيات صلاح جاهين.. وكتر خيره بليغ حمدي كان عقدي معاه إني مغنيش لمدة 3 سنين غير له.. ولما لقاني بختار الرباعيات وسيد مكاوي وانتجه على حسابه قد إيه الراجل ده عظيم.

واختتم علي الحجار حديثه، قائلًا: عايز مدحت صالح يتحرك ويطلع يتكلم ويبرأ نفسه من إنه أخد مشروعي.. وكلموني وقالولي إنهم كلموا مدحت صالح من أسبوع وبيقول هو علي الحجار ليه مكلمنيش ويقول ليه يا مدحت بتعمل كده؟ يا سلام يعني أنت واخد مشروعي وعايزني كمان أكلمك؟ إيه الجبروت ده؟ هو ديمًا بيقول إن علي الحجار استاذي يكلم استاذه بقى.. ومنتساواش ببعض على فكرة.. محدش عنده 300 أغنية محدش عمل 121 تتر مسلسل.. محدش عمل التنوع بتاعي.. مينفعش نقول انتو الاتنين.. أنا آسف والناس هتفهم ده غرور لكن أنا بتكلم في حقائق.. اللي حصل من الوزيرة امبارح ريحت قلبي جدًا جدًا وطمننتني إن المشروع هيتعمل صح.. اللي حصل قبل كده مكنش مشروع.
 

إذا أعجبكِ هذا الموضوع اقرئي أيضًا  علي الحجار يكشف سر حب محمد فؤاد للسعودية