رامي صبري يرد بقوة على عمرو مصطفى : عيب لما تقول عليا حرامي | فيديو 

رد المطرب رامي صبري، على اتهام الفنان عمرو مصطفى له بسرقة لحن أغنيته "رقصة"، قائلًا: "أنا مبحبش أتكلم عن زملائي بشكل سلبي، وعمرو المفترض إنه عشرة كبيرة وصديق واحنا أصحاب وعلشان فيه بيني وبينه عشرة مش هرد بطريقته اللي معجبتنيش واللي اتهمني فيها بالسرقة".

وأضاف رامي صبري خلال لقائه ببرنامج "أجمد 7"، المذاع على إذاعة "نجوم إف إم": "مش رامي صبري اللي يسرق لحن ولو هو يعرفني كويس مش هيتهمني الاتهام ده ممكن يكون فيه توارد أفكار وفيه 10 ألحان ممكن يكون فيهم جملة شبه التانية ومرة عملت أغنية لعامر منيب اسمها "ده مكنش حب وهندم ليه"، بعدها بسنة عمل عمرو دياب أغنية الملحن بتاعها محمد يحيى أغنية "ريحة الحبايب"، والاتنين نفس الشكل، وده مش عيب ومطلعتش ساعتها وقلت هتخانق مع محمد يحيي وارفع عليه قضية".
 

وتابع: "ملحن كبير زي عمرو مصطفى مينفعش يطلع يقول على فنان وملحن مش صغير ومطرب مش صغير أنه سارق ويتهمني بالسرقة، عيب يتهمني بالإتهام ده، أنا مكانتي مش صغيرة في الوسط".
 
وأكمل: “مشكلة عمرو مصطفى مش أغاني، لأن لو حد فينا سرق حاجة منه هيقاضيه وهيعمل كل حاجة بالقانون لأنه خريج كلية حقوق، وأنا خريج معهد موسيقى عربية قسم تأليف موسيقى يعني لما تيجي تتكلم عن متخصص وانت خريج حقوق يبقى لازم تعرف انت بتتكلم عن مين”.

ما رأيك في عمرو مصطفى : أنا لو عملت مهرجانات أبقى بهين كل تاريخي 

 وتابع: “أنا لو مركز معاه هاحبسه بالقانون ولكن أنا بكبر دماغي، أنا مش بتاع خناقات ولا دي طريقتي ولا هرد عليه بطريقته وهقوله ربنا يهديك وأنا شايف انك تشتغل اكتر وتعمل حاجات كتير زي ملحنين كبار تانيين زي عزيز الشافعي ومدين مش مركزين في اللى انت بتعمله”.

ووجه رامي صبري لعمرو مصطفى نصيحة، قائلًا: "ركز في شغلك اكتر واعملنا شغل حلو وانا عن نفسي لو فيه اغنية حلوة ليا هاغنيها، إنما تطلع تقول ده سرق  وده خد مني عيب يطلع من فنان كبير زيك".

وأضاف: "قانونا مش من حق عمرو مصطفى انه يقاضيني ولا يتهمني بالسرقة وانا فعلا مسرقتش منه حاجة، عمرو لما بيغير من نجاح بيطلع يخبط في الناس ومفيش فينا حد عاتبه خالص ودايما يتهمنا بالسرقة ويقول كلنا واقعين طيب ازاي".

ولفت: "نفسي عمرو مصطفى يركز في شغله لأنه فنان كبير وموهوب ومطربين كبار نجحوا بفضل ألحانه زي عمرو دياب ومحمد حماقي، بقوله متعملش عداءات مع الناس ومتقعدش تخبط في الناس حتي لو أنت مش في المرحلة دي وانا بجد اتضايقت منه وأنا مش بحب التقليل من قيمة الناس، أنا المفترض موسيقار زي عمر خيرت وياسر عبد الرحمن".

وأكد: "أنا لو عندي مشاكل نفسية مكنتش خليتك تغني أو تشتغل تاني بالقانون لأني دارس ومتخصص وهو زي التلميذ بالنسبة لي وأنا الأستاذ وهو خريج حقوق ولكن هعديها علشان مراته ست محترمة وأولاده زي أولادي".

 
وكان الفنان عمرو مصطفى، اتهم المطرب رامي صبري، بسرقة لحن أغنيته "رقصة"، قائلًا: "أنا ما ينفعش من شوية أغانيَّ كلها بتتسرق ونزلتها من سنة ولقيته بيقول لي دا أنا عاملها من 2016 طيب أنا عايزك تطلع يا رامي أي حاجة تثبت إنك عاملها في 2016 أو 2009 زي ما قلت في تصريحات تليفيزيونية وأي آلة بتسجل عليها بتوثق التاريخ".

إذا أعجبكِ هذا الموضوع اقرئي أيضًا : أول ظهور لطفلي رامي صبري علي وعمر