خالد سليم : تامر حسني كان صديقي لكنه تغير بعد النجومية | فيديو

كشف المطرب خالد سليم عن حقيقة خلافه مع تامر حسني بسبب تنمر الأول على فيلم "عمر وسلمى" قائلًا: "أنا عمري ما أتنمر على أي حد بالعكس فيلم عمر وسلمى نجح وكان فيه شغل حلو معمول".

وأضاف: “أنا وتامر علاقتنا ببعض من بعيد لبعيد تمامًا احنا أصلًا مش صحاب لكن في البداية كنا صحاب هو كان بيبتدي وأنا كنت عامل “عالم تاني وأغاني السلم والتعبان” فعلاقتنا كانت لطيفة مع بعض لأننا نعتبر شريحة الجيل اللي بعد هشام عباس ومصطفى قمر وإيهاب توفيق".

وتابع من خلال لقائه في برنامج "حبر سري" : "في الفترة دي كنت أنا وتامر وحماقي ماسكين إيد بعض لكن مع الوقت حصل حاجات كتير وتامر عمل لنفسه حتة لوحده وهو عايز يبقى لوحده، فأنا هعمل إيه بس هو بنجاحاته وذكائه هو يستحق إنه يبقى في حتة كويسة جدًّا لكن هو اختار أن يبعد نفسه عننا كلنا”.

واستطرد: "مع أني أسمع إنه بيقابل ناس كتير وأنا مستصعب إن احنا نكون نفس الجيل، يعني ما شاء الله حميد الشاعري وهشام عباس وإيهاب توفيق ومصطفى قمر الناس دي لما واحد بيكون عنده مناسبة كلهم بيجروا على بعض دا فعلًا جيل نهاية زمن الخير وللأسف في الألفينيات لما بدأنا نظهر الخير ابتدا يقل شوية شوية لحد لما ما بقاش موجود مع الأسف".

إذا أعجبكِ هذا الموضوع إقرئي أيضًا خالد سليم يحتفل بتخرج ابنته.. لن تصدقوا الشبه بينهما!