شيرين رضا : مصطلح السينما النظيفة شتيمة (فيديو)

قالت الفنانة شيرين رضا: "مصطلح السينما النظيفة يعتبر شتيمة، هو احنا سينما مش نظيفة؟ سمتها شتيمة لأن السينما فن نظيف".

تابعت خلال الجزء الثاني من لقائها ببرنامج "أنا والقناع" الذي تقدمه الإعلامية إيمان أبو طالب بقناة "سي بي سي": "لازم يبقى فيه كل أنواع الأفلام ما ينفعش نعمل نوعية واحدة فيها الحب والسعادة وبنط فوق السحاب دي مش الحياة، فيه حاجات بتحصل في الحياة بنجسدها في السينما علشان نقرب للحياة الحقيقية".

وأضافت شيرين رضا: "هناك سيطرة ذكورية على صناعة السينما في مصر والعالم كله، وفي كل الوظائف بنلاقي الراجل بياخد فلوس أكتر من الست وبيترقى أسرع من الست والأدوار بتتكتب للرجالة أكتر من الستات".

في نفس اللقاء، قالت الفنانة شيرين رضا: "الجوازات اللي باظت وبنتي الوحيدة علموني وخلوني واحدة مسؤولة ومش كل الناس تعرف تشيل مسؤولية وفيه ناس بتيجي بعد خطوتين تلاتة وتنهار".

وأضافت: "أهلي علموني واللي حصل بعد كده في حياتي عوامل خلتني أعرف أشيل مسؤولية".

وتابعت الفنانة شيرين رضا: "مشكلة مجتمعاتنا إن الراجل مخادع والست كائن ساذج، الست عقلها بيتخدر من المخادعين وعقلي اتخدر قبل كدا وصدقت وعديت بمزاجي".

ولفتت شيرين رضا: "علمت بنتي نور عمرو دياب أهمية النقاش، يعني ما ينفعش أقول لها لا وخلاص لازم أشرح لها سبب اعتراضي أو رفضي، لما بشرح بخليها تسمع، وعلمتها كامرأة تحافظ على مخها ونفسها إنها تكون دايمًا فخورة باللي هي بتعمله وما تتكسفش من حاجة، وطلعت ليَّ أنها جادة وما بتخليش مشاعرها تمشيها وبتعرف تفرق بين الناس".