خالد الصاوي: الفن أنقذني من الموت والإدمان وهذا سر تجسيدي للشاذ في "عمارة يعقوبيان" | فيديو 

قال الفنان خالد الصاوي: "الفن أنقذني من الموت، كان ممكن حد يقتلني أو أنتحر أو أتجنن أو أعيش مدمن، الفن أنقذني من عاداتي السيئة وكل حاجة غلط".

وتابع خلال الجزء الثاني من لقائه ببرنامج "أنا والقناع" المذاع على قناة "الحياة":"الفن أنقذني من إني أعيش في الغلط وأبقى مجرم، كنت ممكن أفكر أشيل سلاح جوا بلدي وأهرب ووقتها ممكن أبقى مجرم واللي أنقذني من دا مسرحية، لإني شُفت شخص شبهه في العمل وهو راح فين والعدو راح فين، ودا شال عبء قلة الخبرة".

وأضاف خالد الصاوي: "اخترت تجسيد دوري في فيلم عمارة يعقوبيان، من باب يا صابت يا اتنين عور، قعدت أمثل وأعمل ظابط فياخدوني ظابط على طول أعمل دكتور ياخدوني دكتور على طول، فالتنميط دا كان خانقني، فعملت الدور كفرصة عظيمة علشان أظهر للناس".

وتابع: "لو عاد بيَّ الزمن هعمل نفس الشخصية اللي فيلم عمارة يعقوبيان، بس لو أنا متجوز مش هعمله، علشان احنا مش في الدنمارك، أيوا هو دور تمثيلي بس هتشتم به، هتتشتم مراتي به واحنا في واقع كلنا عارفينه، الدور عظيم وبحبه وهعمله تاني بس لو كنت عايش لوحدي، ولكن لو أبويا وأمي عايشين مش هعمله".