ويجز: أغانيا بتوصف حالي وأنا بكتبها بنفسي وأقول للمصريين "رفقا بالبنات"

قال مطرب الراب ويجز:"انا بسمع كل حاجة وبحب أسمع كل الأغاني القديمة وكل أغنية عجباني أحب اسمعها، وبحب إيهاب توفيق وهشام عباس، وكل أغاني الثمانينات والتسعينات، وأغنية عودة جميلة مليانة إحساس وينفع اسمعها لأي حد من أي جنسية، من وأنا طفل بحب المزيكا أو اي الة بتعمل صوت".

اسلوب حياة ويجز

وأضاف خلال لقائه ببرنامج "الحكاية" الذي يقدمه الإعلامي عمرو أديب بقناة "ام بي سي مصر":" أسلوب حياتي كل شوية بيتغير بس مؤخرا بقيت احب اصحى بدري وافطر واتمرن شوية، وبعد كده أشوف لو فيه حفلة او بروفة أو أغنية تتسجل، بس بشكل عام مش بتتشاف في حتة إلا بشتغل أو بكون مع أصحابي أو بسوق موتسيكلات في الصحراء بعيد عن الزحمة وعوادم السيارات".

كيفية كتابة ويجز اغانيه

ولفت ويجز:"انا اللى بكتب أغانيا وبقعد كذا مرة أشوفها علشان احفظها، وبكتب اي جملة حلوة عجباني لحد لما احطلها قافية، بس بكتب الأغنية علي وقت طويل وممكن اكتب فيها كام سطر واكملها بعد شهرين، وفي أغاني مشتتة بتوصف حالي، وفي النهاية الاغاني كلها ترفيهية، انا مش بفكر لخمس سنين قدام ولكن بفكر في اللى اقدر اقدمه، بقول للجمهور لا تحكم علي الكتاب من غلافه ولو مش عاجبك الجديد ارجع واسمع القديم، ولو أغنية مش عجباك علشان مودها مش عاجبك شوف غيرها".

وتابع:"المرأة نصف المجتمع وبتكلم علي امي واختي والزوجة، واحنا في مصر ضاغطين علي البنات فياريت بشويش علي البنات".