سامح حسين: اشتغلت فواعلي وأمي أكلتنا بقايا أكل الفراخ (فيديو)

قال الفنان سامح حسين خلال لقائه ببرنامج "واحد من الناس"، تقديم الإعلامي عمرو الليثي المذاع على فضائية “الحياة”: "عشنا فترة صعبة جدا لكن كان عندنا عزة نفس، وكانت والدتي تروح لأقاربنا وتقول إننا بنربي فراخ في المنور، ويدوها بقايا أكل للفراخ، لكن الحقيقة إحنا كنا الفراخ وأكلنا بقايا الأكل، ولذلك أنا بدأت أشتغل من صغري".

وأضاف سامح حسين: "أنا عندي ألم في فقرات الظهر السفلية من أيام دراستي في الجامعة، لإني كنت محتاج فلوس جنب الدراسة، واشتغلت فواعلي أشيل طوب ورمل وأطلع عمارات".

واوضح سامح حسين : " اشتغلت مساعد مخرج كتير مع خالد جلال ووائل إحسان وسعيد حامد، وكان ممكن أطلع بجملة"، مضيفا: "في فيلم صاحب صاحبه اشتغلت مساعد مخرج، وعملت مشهد صغير مع محمد هنيدي، لكن في العرض الخاص اكتشفوا إن الفيلم طويل وقررا يسحبوا بعض النسخ ويعيدوا المونتاج".

وأكد: "بقى في نسخ من الفيلم معروضة في سينمات معينة وأنا موجود فيها، ونسخ في سينما أخرى أنا مش موجود فيها، لإن مشهدي كان ضمن المشاهد المحذوفة".