علا غانم تبكي علي الهواء وتكشف تفاصيل اعتداء زوجها عليها بالمنزل | فيديو

دخلت الفنانة علا غانم، في نوبة بكاء على الهواء، بسبب زعم تعرضها  للعنف والقهر والطرد من منزلها على يد زوجها وعدد من الأشخاص المجهولين.

وقالت الفنانة علا غانم باكية، خلال مداخلة هاتفية ببرنامج “الحكاية” الذي يقدمه الإعلامي عمرو أديب بقناة “mbc مصر”:" يوم الجمعة بعد الصلاة فجأة لقيت أحد الخفر بيندهلي وبيقولي فيه ناس كتير بيقولوا أنهم تبعك، طلعت بسرعة أشوف مين الناس دي طلعت علي البلكونة لقيت ناس كتير وعربيات كتير وستات، وقالولي أفتحي عندنا حفلة وعندنا تنضيف".

وأضافت:" ابتدين اقولهم هطلب البوليس لإنهم بدأوا يدفعوا البوابة، فجأة لقيت واحد اسمه محمد حسين كان بيشتغل مع جوزي زمان وبيقول إيه يا علا أفتحي الباب وبيكلمني بطريقة حقيرة فقلت له اتكلم بأدب وأنا بطلب البوليس وبدأت أصرخ وفجأة لقيت ناس غريبة دخلت، فلقيت زوجي ومعاه الشخص ده وحاولوا يفتحوا البوابة علشان يدخلوا الناس وضربوا الخفر بتوعوا".

واستطردت:" بقيت أصرخ وواحد منهم  مسكني من الروب وبيحدفني زي الكورة، فجأة البيت كله دخله حوالي 20 شخص ستات ورجالة، أنا ساكنة في المريوطية، وبعدين مش ملاحقة الناس واقتحموا البيت".

وأكملت:"الستات حاولوا يكتفوني وبعدين جريت علي أمي، وجوزي اللى رافعة عليه قضية خلع، كانوا بيحاولوا يمكنوه من البيت والستات خدوا مني موبايلي وكتفوني وهو مسح الفيديوهات الخاصة بالكاميرات، البيت ده بيتي من سنة 99 من قبل ما اشوفه واتجوزه، أمي اتضربت بالشوم قدامي من جوزي، وجاء البوليس بعد فترة واحنا كنا في الجنينة وهو جوا البيت، وحكيت لهم القصة كلها وبعد نص ساعة روحنا على قسم الشرطة وفجأة لقيت كل الناس اللى اتهجموا عليا مشيوا، ولما طلعنا علي القسم قالولي انتى صاحبة الشوم ده فقلت له لأ دا هما اللى اقتحموا بيتي".

وأضافت علا غانم:"عملت محضر فيه وقالولي لو متصالحتوش انتي وأمك هتقعدوا لتاني يوم، وهو بيقول إن بيتك كبير ممكن يعيش في جزء منه علشان زوجك، فقلت لهم ده مش زوج وأنا رافعة عليه قضية خلع، فرفضت التصالح وبعدين فتحوا التحقيق وفضلت في النيابة لحد تاني يوم الصبح، وأنا مروحة مشيت 10 متر من القسم لقيت اللى شغالين في البيت بيصرخوا وبيقولوا أن فيه ناس ملثمين اقتحموا البيت وخرجوهم منه وضربوهم، فرجعت تاني علي القسم ونزلوا معايا قوة وهو كان جوا ومعاه ناس مسلحة وبيقول محدش للناس اللى معاه محدش يضرب نار.

وأردفت:" أنا دلوقتي مشكلتي مش البيت انا خايفة علي نفسي وأمي، هو دلوقتي في بيتي، وانا في حتة تانية، هو احتل البيت مع الناس اللى رموا عليا مولوتوف، أنا روحت لكل الناس والموضوع حاليا عند المحامي العام وأنا منتظرة الرد ومحكمة الأسرة كانت المفترض تحكم من شهر بس هو رد المحكمة، أنا بقالي في القضاء من 2018 عايزة انفصل عنه مش عارفه".

علا غانم، قالت الفنانة علا غانم بأنها تتعرض  للعنف والقهر ومهددة بالطرد من منزلها  وطلبت الاستغاثة من المركز القومي للمرأة.