انغام: اللي شفته ما كانش سهل وخايفة الالتصاقات تسبب لي مشاكل بعد كدا (فيديو)

قالت الفنانة أنغام: "اللي عديت بيه ما كانش سهل وما عديتش بيه إلا بحب ودعوات الناس، أشكر كل الناس على دعمهم ليَّ اللي صلوا ليَّ واللي ولعوا ليَّ شموع في الكنائس والأمهات الحلوة اللي دعت لي، وأشكر كل الزملاء ومن زارني في المستشفى، وأشكر أهلي وأخواتي وأولادي وأمي اللي تعبت نفسيًّا وجسديًّا".

وأضافت: "أنا حاليًّا في مرحلة التعافي ومجهدة شوية لإن هما خبطتين في الرأس، فتح جراحي ثم بعد يومين حصل مضاعفات قوية أخدت فترة أكبر من العملية وكانت أشد وطأة عليَّ".

وتابعت خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "جسمي يتعافى شوية شوية والحمد لله، ما سألتش الطبيب عن مشكلة الالتصاقات اللي اتعرضت لها وما إذا كانت هتسبب لي مشاكل في المستقبل لأني بحاول أتفاءل، لكن اللي فهمته إن أي شخص بيفتح بطنه عن طريق الجراحة معرض للالتصاقات".

وأكملت الفنانة أنغام: "ربنا ما يكتبها على حد إنه يعمل عملية جراحية في البطن وبعدين يعاني من مضاعفات والتصاقات".

ولفتت: "كنت ممنوعة تمامًا لمدة 10 أيام من الأكل والشرب وسمحوا لي في الأول بتناول السوائل الدافئة والأكل خفيف جدًّا وبعدين قالوا لي كلي، وبتعامل مع أمعائي زي الطفل اللي بيتولد من جديد، وكل شوية أقوم أتمشى علشان ما يحصلش مشكلة في ارتخاء أمعائي".

وأضافت: "حسيت إن وقع عليَّ بلكونتين مش بلكونة واحدة، الأولى العملية وبعدين شكرت ربنا على العملية وما أهملتش وبعدين حصل لي التصاقات في الأمعاء، وكان عندي حفلات في الكويت وحفلة مصر وكانوا أكبر همي لأن الناس كانوا اشتروا التذاكر حتى بعد لما عملت الجراحية كان عندي أمل أن أغني حتي لو أنا قاعدة علشان ما أزعلش الناس".

وتابعت:" أنا بحب اللي بعمله ومتعتي الوحيدة الغناء وإسعاد الناس، لكن دي إرادة ربنا وحاولت ألتزم بتعاقدات الحفلات لكن ربنا ما أردش البلكونتين نزلوا عليَّ".

وأكملت: "ممكن تكون عين وحسد بس أنا مش الناس اللي بركز خالص وبتوكل على الله ودايمًا القرآن شغال في أوضتي قبل التسجيل والتصوير، ودايمًا مستعينة بالله دايمًا وما عنديش الفكر بتاع الحقوني من الحسد وبحاول أتصدق وأفادي نفسي لكن فيه إرادة ربنا في الآخر، وإن شاء الله أقل من شهر وأرجع للمسرح لأن عندي حفلة في الكويت يوم 26 الشهر ده قبل رأس السنة".