سوسن بدر عن فشل حياتها الزوجية: تعرضت للإهانة والخيانة.. وهذا موقفي من تكرار الزواج | فيديو

قالت الفنانة سوسن بدر: "لا أعتبر نفسي ناجحة كزوجة ولم يقدَّر لي النجاح في حياتي الزوجية وهذا قدر، ولا أعرف إذا كان الخطأ مني أو من زوجي".

وتابعت خلال لقائها ببرنامج "واحد من الناس" الذي يقدمه الإعلامي عمرو الليثي بقناة "الحياة": "الحياة رمادي وأبيض وأسود، ويمكن لو أنا فيه لحظات مشيتها رمادي، ولكن تمسكي بالأبيض والأسود والحالة اللى اتخلقت عليها جزء من قدري فمقدرش أقيِّم إذا كنت كويسة أو كنت على خطأ في حياتي الزوجية".

وأضافت: "أحمِّل نفسي نصف في المائة من فشل حياتي الزوجية وأنا حقانية ومكدبش خالص، وفي الجواز مفيش بدايات ولا نهايات بتفرض على أي طرف في الحياة الزوجية، ولكن أنا عملت اللى كان المفروض أعمله ساعتها.. والنهاردة وبعد التجربة والخبرة كنت هاعمل نفس المواقف لأن فيه مبادئ مش هتتغير، وحاجات مش هتنازل عنها، ومفيش حد عنده حق أنه يهين أو يخن حد".

وأكدت: "عشت الإهانة والخيانة وده كان سبب انفصالي وفشل حياتي الزوجية، وشاكيرا نفسها اتخانت ومين اللى ميحبهاش بس هي اتعرضت للخيانة".

وأضافت: "الإهانة ممكن تبقى في خناقة وتبقى طبيعة وتربية الإنسان بس ده مش مبرر ولا فيها تسامح، وأنا ممكن أسامح في العصبية وبيحب النظام زيادة عن اللزوم وأنا بحب الهرجلة فابقى انظلم الدنيا، ولكن الخيانة والإهانة والكدب مينفعش أعديها ولا أتسامح فيها ومش علشان أنا عنيفة أو وحشة أو متسلطة ولكن علشان عندي مبادئ وبحترم نفسي".