حسام داغر يتذكر مواقف هشام سليم: جريت ورايا لما بكيت وأنصفتني لما ظلموني

نعي الفنان حسام داغر، الفنان هشام سليم الذي رحل عن عالمنا اليوم الخميس بعد صراع مع المرض.

وقال حسام على فيس بوك: “رحل الجميل الطيب الجدع الحنين ابن الناس .. النضاف بيمشوا واحد ورا التاني.. لما شالولي مشاهد ليا في فيلم كلام في الحب وكان أول فيلم أشارك فيه وطلعت برة القاعة في العرض الخاص وبكيت جريت ورايا تطبطب عليا وخصوصا إن في مشاهد انت كنت فيها معايا وحضنتني وقلتلي اجمد لسه ياما هتشوف ”.

وأضاف: “  لما انا اختلفت معاهم في مسلسل لحظات حرجة وكان المخرج الكبير ساعتها أول مرة يخرج ومكانش مقدر اني عندي مسرحية مبلغ بيها الإنتاج وكان لازم أمشي قبل الساعه ٩ وخرجت من أوضتك يومها زعقت فيهم وفكرت المخرج يومها اللي اتريق علي فكرة المشاركة في المسرح واعتبرها تضييع وقت وان والده الكاتب الكبير أساسا كان موظف في مسرح الدولة وشرحله قاعدة إن المسرح يلغي التصوير والتصوير يلغي البروفه وقلتلي انت لسه هنا اجري الحق مسرحيتك يا حس”.

وتابع: “ كنت دايمًا ميهمكش وهيهمك مين وانت المتربي علي الأصول والأخلاق وجبر الخاطر.. ربنا يجعل تعبك ومقاومتك للمرض اللعين في ميزان حسناتك.. طول عمرك محارب حاربت واتحاربت كتير.. لكن المرادي للاسف خسرت المعركة وخسرنا كلنا هشام سليم.. ارتاح ونام ما هي الا نومة بنرتاح فيها كلنا.. او ممكن اعتبرها … استراحة محارب  مع السلامه يا برنس السينما والمسرح والتيلفزيون.. مع السلامه استاذ هشام سليم ”.