هاني شاكر يوجه رسالة قوية لمصطفى كامل.. بعد تصريحاته حول فساد نقابة الموسيقيين| فيديو

قال الفنان هاني شاكر: "بكل تأكيد استريحت نفسيًّا بعد استقالتي من منصب نقيب المهن الموسيقية، ودلوقتي باهتم بصحتي وحياتي الخاصة ومركِّز جدًّا في شغلي وحياتي".

وتابع خلال مداخلة هاتفية ببرنامج "كلمة أخيرة" الذي تقدمه الإعلامية لميس الحديدي بقناة "أون إي": "أقول لجمهوري هتسمعوا أغاني جميلة جدا الفترة اللي جاية، وهيكون مشروع غنائي جديد، وكل شهر ونصف هقدم عمل جديد".

وعن موقفه من انتخابات مجلس نقابة الموسيقيين، علق: "طول عمري مش حريص أوي على الانتخابات، ولم أقرر بعد المشاركة في انتخابات الموسيقيين".

وردًّا على تصريحات الفنان مصطفى كامل بشأن وجود فساد في نقابة الموسيقيين، علق هاني شاكر: "الفساد موجود من سنين طويلة، مش في فترتي بس، وفي وجودك كان فيه فساد يا مصطفى، وبتمنى لأي حد جاي نقيب موسيقيين يتحاسب بالورقة والقلم، زي ما أنا اتحاسبت بالورقة والقلم، والأرقام لا تكذب ولا تتجمل".

وتابع: "أتمنى مسيرة النجاح تستمر في نقابة الموسيقيين.. وبقول لمصطفى كامل: بطل تتكلم عن الفساد لأن الفساد هيفضل ومش هينتهي، وركِّز على إيه اللي هتعمله للنقابة.. إحنا عايزين نقيب موسيقيين، مش وكيل نيابة ولا مأمور ضرائب، النقيب جاي علشان يرتقي بالمهنة ويحافظ على اللي إحنا وصلنا له، ومحاربة الفن الهابط مش يحارب الفساد بس".