رد فعل كوميدي من سليمان عيد بعد مقلب رامز جلال في رامز موفي ستار

وقع الفنان سليمان عيد، مساء اليوم الخميس، ضحية رامز جلال في الحلقة 20 من برنامجه «رامز موفي ستار»، الذي يُعرض عبر فضائية «MBC مصر» طوال شهر رمضان.

سخر الفنان رامز جلال من ضيفه الليلة ضمن استضافته له في برنامج "رامز موفي ستار" الذي يعرض على mbc قائلا "ظهر في الفترة الأخيرة جيل جديد من الكوميديانات اللي بيستسهلوا ومبيتعبوش على الإفيه، فاكرين خفة الدم بالساهل، واللي زي الناس دي بيفرقعوا بسرعة وبيختفوا بسرعة، مش زي النجم اللي جاي لنا النهاردا".

وأضاف "بقاله عشرين سنة بيقول إفيهات وينبوع لطافته لم ينضب بعد، الراجل ده مش موهوب وبس ده عامل زي السحلية؛ بيتلون وبيتغير ويتأقلم مع الظروف، لقى التيك توك مجنن الناس قال لا مبدهاش واقتحم عالم السوشيال ميديا وهو في أرزل العمر وأمرطنا بوابل من الفيديوهات أخرج فيها طاقة الكوميدية".

تابع " الحقيقة هو بدأ كويس لحد ما الفترة الأخيرة بدأ يهيس والعملية فرطت منه، عشان كده أنا جايبه النهاردا أعرفه غلطه وأرجعه على تراك الكوميديا السليم وفي نفس الوقت هوريه الجحيم"، مضيفًا "معانا ومعاكم صاحب الفيديوهات الأشهر، الكوميديان الأشطر، المضحكاتي الأسمر سليمان عيد".

وبعد اكتشاف المقلب وإظهار رامز جلال نفسه للضيف، أبدى سليمان عيد رد فعل كوميدي، ليقول "ينهار اسود.. دنا كنت هموت"، مضيفًا "بتوع مسرح مصر كلهم هيفرحوا فيا وحمدي الميرغني أول واحد".

وكشف عن صلة القرابة بينه وبين الفنان حمدي الميرغني، قائلا: «أبوه ابن خالتي وأمه بنت عمتي.. خاله عمي»، ليضيف: «عيالي بيحبوك أوي يا رامز».

وكان رامز نشر صورة له مع سليمان عيد من الحلقة علق عليها "سليمان عيد بعد المقلب الشديد".

وشملت قائمة ضيوف برنامج رامز جلال الجديد في مجال الفن عددا من الأسماء، هم ياسمين صبري، عمرو يوسف، غادة عادل، محمد أنور، صابرين، نجلاء بدر، هدي المفتي، تارا عماد، سنتيا خليفة، وكل من نجمي الكوميديا سليمان عيد ومحمد محمود بالإضافة إلى الفنان السعودي الكبير عبد الله السدحان.