انتصار تكشف كواليس مشاجرتها مع كاملة أبو ذكرى على كوبري قصر النيل|فيديو

كشفت الفنانة انتصار، كواليس مشاجرتها مع المخرجة كاملة أبو ذكري، علي كوبري قصر النيل، خلال تصوير مسلسل "بـ100 وش".

وقالت "انتصار" خلال الجزء الثاني من لقائها ببرنامج "العرافة" المذاع علي قناة "المحور":"العلاقة مع كاملة أبو ذكري كانت تسير بشكل كويس خلال أيام التصوير لحد لما حصلت مشكلة بسبب إننا لازم نتجمع الساعة 5:30 الصبح والمفترض ننزل علي وسط البلد وكنا في مكتب يوسف شاهين في شارع شامبليون، فدخلت عليها انا ونيللي الساعة 5:50 الصبح وباسم سمرة دخل 6:05، فسابتهم كلهم ومسكت فيا انا، وقالتلي انتى اتأخرتي فقولتها لأ مفيهاش حاجة تلت ساعة محصلش حاجة، فقالتلي لأ حصل حاجات".

وتابعت:"كاملة أبو ذكري تعشق الفركش أوي، فقلت هتيجي فيا أنا ولا ايه وانا اللى هشيل اليوم، وقالتلي مينفعش تتأخرى تلت ساعة، وكنا واقفين انا وهي علي كوبري قصر النيل يوم الجمعة لوحدنا، والدنيا اجازة ونيللي كريم وباسم سمرة اختفوا ومحدش وقف معايا ولا هدوا المخرجة".

وأكملت:"لقيت نفسي لوحدي علي كوبري قصر النيل في مواجهة كاملة أبو ذكري، وقلت لها محصلش حاجة ولولا انى زعقلتها كان هيحصل فركش ومش هنكمل تصوير، وهي اللى زعقتلي الأول ومينفعش حد يزعقلي".