هاني مهنا: عبد الحليم حافظ لم يتزوج من سعاد حسني

قال الموسيقار هاني مهنا: "لست ضد كل أغاني المهرجانات، ولكني أرفض المهرجانات المبتذلة والتي تحمل ألفاظًا خارجة".

وعلق "مهنا" خلال لقائه ببرنامج "سابع سما" الذي تقدمه الإعلامية راغدة شلهوب بقناة "النهار"، على صورة الإعلامي مفيد فوزي، قائلًا: "بيعمل سيناريوهات مش حقيقية، وما زعلتش منه إلا لما قال إن عبد الحليم حافظ اتجوز سعاد حسني وهذا ما حصلش وده عرفته من العندليب نفسه وليس نقلًا عن أحد".

وتابع: "عبد الحليم حافظ كان بيحب سعاد حسني وهي كانت بتحبه وكانوا على علاقة كويسة ببعض ولكن محصلش جواز".

وقال الموسيقار هاني مهنا، في نفس اللقاء: "أول يوم دخلت فيه السجن أو الزنزانة ما نمتش لحد الصبح، وما كنتش مصدق وكل الموضوع إني بقرأ قرآن وأعيط ودموعي نازلة".

وأضاف: "لما دخلت السجن كنت بقول لنفسي هو أنا بحلم، وتاني يوم الصبح صحيت طلعت من الزنزانة ورايح المكان اللي بنقعد فيه تفاجأت بواحد بيقول لي أنا ابن اللواء الفلاني، فقلت له والدك كان صاحبي جدًّا، وكانت مشكلته إن زوج أخته بيتخانق معاه فضربه فعمل له عاهة وأخد 3 سنين سجن".

وتابع: "قابلت في السجن علاء وجمال مبارك وحبيب العادلي، وقعدت في السجن 6 شهور بعد لما دفعت 3 ملايين و200 ألف جنيه بسبب قرض كنت أخدته من البنك لعمل إستوديو".

ولفت: "ربنا كان لطيف بيَّ وأنا في السجن واستفدت بالفترة الصعبة دي وكنت بصلي الفرض في وقته وأقرأ قرآن وألعب رياضة".

وأكمل: "حبيب العادلي في السجن قال لي نصيحة مفادها إن تجربة السجن هتفيدك بعدين هيبقى فيه فرز عندك مين اللي أنت فاهم إنه صاحبك ومين اللي مش صاحبك وبقى صاحبك ودا اللي حصل".