ملحن "عيش بشوقك" يرد على حمادة هلال: الكداب بيروح النار... لو كنا جينا عليك مكنش ربنا كرمنا

رد الملحن بلال سرور على اتهامات النجم حمادة هلال له وللشاعر الغنائي مصطفى حسن، بأن أغنية "عيش بشوقك" كانت له قبل أن يقدماها للنجم تامر حسني. وكتب بلال سرور عبر حسابه بموقع Facebook منشوران للرد على حمادة هلال، جاء في الأول: " مرة فنان كلمناه أنا والشاعر مصطفى حسن، يجيلنا يجرب غنوة بصوته، الفنان ده جيه وغنى واتبسط، ثم اختفى 6 شهور مبيردش حتى على تليفون، فالأغنية راحت لصاحب نصيبها، يقوم الفنان الأولاني يبدأ يطالب بأحقيته في الغنوة دي ويدعي إنها أغنيته وإنه تعب فيها!! الكداب بيروح النار".وبعدها كتب في منشور طويل يروي تفاصيل الأزمة: "بمناسبه وصول عيش_بشوقك ١٣٠ مليون وعشان جالي كذا تعليق متضايقين من طريقه تعليقي علي اللى قالو الفنان حماده هلال فانا بعتذر أولا ثانيا إسمحولي أرد صديقي الفنان مصطفي حسن كلم حماده هلال وطلب منه يجيلنا يجرب صوته علي غنوه مهمه الفنان حماده جالنا وجرب الاغنيه وعجبته وكان يوم جميل وكله تمام لفتره كبيره انا مش فاكر هيا قد إيه كنا بنحاول نكلم حماده ونبعتله رسايل ومفيش اي نوع رد منه لا بالسلب ولا بالايجاب بيروح افراحه وشغله عادي وحفلاته وبيسافر ويرجع وبرده مبيردش، بيقابل فنانين وبيسمع اغاني تانيه عندهم وبرده مبيرجعلناش يقولنا ناوي يعمل ايه بعد ما صلينا استخاره. سمعنا اغنيه لصديقنا المنتج هاني محروس اللي كان بيحضر انه ينتج اغنيه للفنان تامر حسني فالتوقيت ده واتفقنا ان الاغنيه يغنيها تامر حسني وبرده حماده مش ظاهر فالصوره.
وأضاف: الغنوه سجلناها وبدا تامر تصويرها، هنا ظهر الفنان حماده، وبدا يكلم مصطفي حسن يللا انا جبت منتج للاغنيه تعالو ننفذها وهو هيحاسبكوا، الفكره بالنسبه للفنان حماده انه مكنش عايز يشتري الاغنيه هو كان راكنها وبيدور علي حد يشتريها، احنا طبعا اتصدمنا وفهمناه ان الاغنيه اتباعت، طبعا هو كان متضايق جدا بس ده فشغلنا شئ طول الوقت وارد لان انت ملتزمتش معانا بحاجه !!!! ولا حتي بتقدير انك تتواصل معاناحماده اتضايق جدا وبقي بيطلب مننا باي شكل نرجع الغنوه وان المنتج هيديكو اللي انتو عايزينه.
واستكمل بلال سرور كاتبا: احنا طبعا كنا التزمنا مع هاني محروس والفنان تامر حسني وأنا بقسم بالله ومش محتاج احلف اني من كتر ما صعب عليا حماده فكرت انا ومصطفي نستاذن تامر ونرجعله الاغنية، فالتوقيت ده الفنان حماده هلال كلم الفان تامر حسني، وطلب منه الاغنيه وافترا علينا وقاله انها معموله علي ايدي وشقيت فيها طبعا ده محصلش، ومش منطقي اصلا انه يحصل. بس هو قال كده عشان يأثر علي تامر، وبالفعل الفنان تامر حسني كلمني وقاللي هو اللي بيقولو حماده ده صح انا طبعا ركبني عفريت، وفهمته القصه وخلص الموضوع، واعتذرنا لحماده وكل الدنيا غلطته".
واستطرد: ولما الغنوه نزلت ونجحت بقيت مل ما اقابل حد لمده شهووور يقوللي ليه عملتو كده مع حماده، اروح مفهمه القصه كإني متهم، وكل الناس اللي فالوسط عارفين الموضوع ده
وعارفين ان حماده مش صاحب حق، دلوقتي بعد ما عدي سنين الموضوع اتفتح، وناس عماله تبعتلي كلاك غريب وانتو ازاي تعملوا معرفش ايه !!!!! الجمهور والفانز انتو فوق راسنا كلنا واحد واحد، بس مش معني انك باحب فنان انك تصدق وخلاص وتتهم فنان تاني بحجات مش حقيقية الفنان الكبير تامر حسني بره القصه دي تماما، وهو مش ناقص اغاني عشان ياخد حاجه مش بتاعته الغنوه دي غنوه تامر حسني وانا فخور انها فتاريخه وفمشواري".

ووجه كلامه لحمادة هلال كاتبا: ولو كنا جينا عليك يا حماده مكنش ربنا كرمنا فيها …. وانت لو صاحب حق مش هتطلع تقول مده علي فنان ونجم كبير إنت عارف انه بره القصه.
يذكر أن حمادة هلال صرح أن أغنية "عيش بشوقك" والتي قام بغنائها المطرب تامر حسني، كانت في الأصل له واستمر في العمل عليها لمدة 6 أشهر.
تابع حمادة هلال قائلا خلال حواره مع الإعلامية أسما إبراهيم في برنامج "حبر سري" أنه انشغل لفترة قصيرة تراوحت من أسبوعين لثلاثة أسابيع بسبب مرض والدته بعد العمل على الأغنية لمدة 6 أشهر.