فيفي عبده: الرقص مهنة شريفة وعانيت من نظرة الناس

خلال حلول الفنانة فيفي عبده ضيفة على برنامج "حبر سري" الذي تقدمه أسما إبراهيم على شاشة "القاهرة والناس" دافعت النجمة فيفي عبده عن مهنة الرقص من الهجوم عليها، قالت فيفي عبده: "اللي بيقول الرقص مهنة غير شريفة يخليه في حاله وميتفرجش، واللي بيحب الرقص هو اللي يتفرج عليه، مفيش فرح في العالم مفهوش رقص ولا فن موجود في كل العالم مش مصر بس، والرقص لغة مش محتاجة ترجمة".
وواصلت فيفي عبده: أنا عانيت من نظرة الناس ليا، مع أن شغلتنا المفروض محدش يبصلها نظرة وحشة، والرقص زي البالية وفن زي أي فن، وأنا من ضمن الفن ده وهو وظيفتي.
كشفت النجمة فيفي عبده عن رغبتها في تجسيد قصة حياتها بنفسها في عمل فني قالت فيفي عبده: "نفسي أعمل قصة حياتي وأنا أحكيها بنفسي زي ما أنا عشتها وحسيتها دون إضافات، زي أي إنسان بيعاني وبيتعب وبيلاقي ويتخدع، الإنسان بيمر بحاجات كتير".
وتابعت: مشواري كان صعب أوي، وتعبت وساعات ببص لرجلي وأقولها تعبتي معايا، أنا حياتي كانت صعبة وأنا صغيرة، وبدأت من البداية خالص، وطلعت السلم واحدة واحدة وتعبت وعانيت وكنت فقيرة.
وأضافت: أنا كنت فقيرة وبعد كدة بقيت متيسرة وبقى عندي فلوس أعيش عيشة أحسن شوية، وعشت كل المراحل، واللي بيلاقي الحاجة على الساهل بتروح منه، الحياة فيها ظلم وخير، وناس بتساعدك وتتبطب عليكي وناس بتدوس عليكي، بس أنتي بتتعلمي من الحياة، وهي الدنيا كدا.