نجوم الفن بين معارض ومؤيد لقرار وقف مطربي المهرجانات

بعد إصدار  جمعية المؤلفين والملحنين والناشرين المصرية “الساسيرو”، بيانا تعلن فيه رفضها الكامل لكافة أنواع الابتذال الفني ودعمها لحرية الإبداع فقد آثار قرار منع ١٩ من مطربي المهرجانات من الغناء الذى أصدره نقيب المهن الموسيقية الفنان هاني شاكر جدلا واسعا خلال الأيام القليلة الماضية وخصوصا بعد تصريحات رجل الأعمال نجيب ساويرس وخلافه مع هاني شاكر وأيضا بين نجوم الوسط الفني ونجوم المجتمع ما بين مؤيد ومعارض وأبرز التعليقات :

وقال مدحت العدل :" أنا شخصيا بسمع وبشوف ولادي بيسمعوا إيه، والعكس صحيح ، ويخضع الأمر بيننا لنقاش دائما، عشان نشوف إيه الوِحِش وإيه الحلو أنا مش بناقش قرار.. ولا المنع الذي يمارسه داخل نقابته وداخل اختصاصاته". 

قال الموسيقار هاني شنودة  : "أنا مش مع المنع لكن اللي يقول أغاني وكلمات خارجة شرطة الآداب والنيابة تحبسه وتعاقبه ما ينفعش كل واحد يقوم بدور الثاني ، وما ينفعش أنا كموسيقي أمنع وشرطة الآداب تتفرج  اللي يقول كلمة مش مؤدبة أو خارجة  فيه شرطة آداب وشرطة المصنفات معنية فقط بالحقوق الخاصة بالملكية الفكرية".

 الفنان والسيناريست عباس أبو الحسن : "‏الغناء أحد صنوف الفنون و الفنون أساسها حرية التعبير والتجربة والابتكار النقيب وظيفته فقط الالتزام  بحرمان أو معاقبة من يخالف  مواد القانون العام والجرائم المحددة المنصوص عليها في قانون العقوبات كالألفاظ الخارجة والسب والعريده انت لو جمعت جمهور حمو بيكا وويجز وشاكوش ومروان بابلو في سنة فهو يزيد عن جمهور عمرو دياب من يوم ما غني في خمسين سنة دي اسمها نقابة المهن الموسيقية .. يا نقيب ! مسمهاش نقابة " جماليات قواعد العلوم الموسيقية أيها النقيب الجليل !  أو سموها باسمها الحقيقي : نقابة " الوصايا " علي الغناء للإله هانى شاكر  - حقبة الأسرة الضاحكة".

كتبت الفنانة شهيرة  :"هاني شاكر لا تحزن نحن الآن في زمن العبث، والقامات ليس لها مكان إلا في قلوب من رحم ربي".

وكتب عصام كاريكا : "من حقي كفنان أنتمي لنقابة محترمة ونقيب محترم إني ازعل من المهندس نجيب ساويرس لما يقول انت بتنفسن من مطربي المهرجانات !!!! لا يا هندسه ده الاسطوره اللي عايشين علي اغانيه وبنحب علي صوته ... واسمه هاني شاكر ... إوعي حد يقولي انت بتطبل علشان أنا عضو عامل من سنه ١٩٩٥ .. وعملت أغاني كتير لهاني بس الساكت عن الحق شيطان أخرس .. أي فنان بيحب نقابته يعمل بوست وميفكرش غير في الحق ... ولو خايف علي الجونة ممكن تروحها بفلوسك  ... #أدعم_هاني_شاكر وشير البوست خلي العالم كله يعرف".

علق المطرب عمر كمال : "يجب ان تمنع تلك الفئة، لأنها تقدم شتائم علني وعلى النقابة أن تقوم بعمل شعبة للمهرجانات، ومن يقدم أغنية يقوم بعمل إقرار أن تجتاز  الرقابة مثلما حدث معي".

كتب المخرج ماندو العدل : "أنا ضد منع أي نوع من أنواع الفن ومع حرية الإبداع طبعا لكن لما مغني يطلع يشتم واحد تاني بالأب والأم علي المسرح يبقي ده لا فن ولا إبداع ولازم يتوقف ؛ يا استاذ نجيب هاني شاكر ده مطرب حقيقي من تقريبا ٥٠ سنة  يعني عنده تاريخ كبيرعيب تطلع تتكلم عليه كدة وتقلل منه… أنا مع هاني شاكر وبلاش كلام فارغ".

كتب الشاعر بهاء الدين محمد :" أستاذ #نجيب_ساويرس اوعى تشوف الفن تسليه أو هيصه لأنك فاهم بس عنيد و‏الأغنية مالهاش قانون يحكمها  ولكن الأخلاق لها قانون اللى هى رقابة المصنفات، ولكن اللى يسقط في اختبار النقابة مش من حقه يغنى من خلال القنوات الشرعية ودى قضية مش مهمة ومش حيشوفها ويفهمها إلا الفنان المتوافق عليه ولكن الجماهير في النهاية بتختار بذوقها ومزاجها".

وكتب الشاعر الغنائي تامر حسين :" أستاذ هانى شاكر النقيب المُحترم  كُل الدعم والتقدير لتاريخك الفنى المحترم واعمل الصح وما يُمليه عليك ضميرك الفني والأخلاقى سمعتك سبقاك يا أستاذ هانى الراجل لا بيقطع أرزاق حد ولا يقبلها الراجل عايز  إرساء مبدأ والعقوبات لأي من يُخالف من أكبر مُطرب لأصغرب مُطرب والساحة الفنية واختلاف أذواق الجمهور وتعدده ميزة  اللى يزهق من نوع يسمع التانى والتالت والرابع  لا يمكن الموضوع يكون قطع أرزاق تماماً  الناس اللى بتوهمك بكده  بتِتاجر بالموضوع ".

وكتب الإعلامي محمد على خير " عزيزي م.نجيب ساويرس اخر ما اتوقعه من ثري مصري أن يشجع علي انحدار الذوق العام تمنيت كمواطن من ثري مثلك بدلا من ان يتحدانا بدعوة مطربي المهرجانات وكفالتهم في مهرجانه ان يتحدانا بدعم البحث العلمي..بدعم المتفوقين في جامعاتنا..بتمويل رحلات ابتعاث طلابنا بالخارج..بس للاسف دعم هؤلاء مبيعملش تريند اكيد ننتظر ممن يمتلكون الثروات في بلادنا شيء ما يستحقه النابغون في مجالات العلم وليس الفن فقط يا نجيب بيه.مساءك فل".