ياسمين رئيس : جوزي كل شغله مع ستات وأكتر واحد بياخد باله لما أعمل شعري

وخلال استضافة  الفنانة ياسمين رئيس في برنامج "الحكاية" المذاع عبر قناة MBC مصر قالت إنها تغير شكلها كثيرا بحكم عملها كممثلة سأل الإعلامي عمرو أديب ياسمين رئيس "جوزك بياخد باله لما تعملي شعرك؟" فأجابت: "طبعا، جوزي أكتر واحد بياخد باله، شغله كله مع ستات، وزوقه حلو في كل حاجة." وعن أهمية الكلام الحلو من الرجل لزوجته قالت: "طبعا لازم تقول كلام حلو طول الوقت، وطول الوقت تاخد بالك من أي حاجة في شكلها. أنا ممثلة ويمكن وضعي مختلف، بغير شكلي كتير بحكم شغلي، بس لو أنا مفيش في حياتي غير جوزي لما أروح أعمل شعري لازم يقوللي كلمة حلوة، ويحسسني إنه خد باله."

سأل الإعلامي عمرو أديب ياسمين رئيس "أد إيه الحلاوة مهمة؟" فأجابت: "زمان أول ما ابتدت السينما كانوا بيقولوا إن الحلاوة مهمة، بس مع الوقت كل حاجة اختلفت. زمان كان التوجه فتاة الأحلام، إنما دلوقت إزاي تبقى شبه الناس."

وعن سر التقاطها ملامح الفتاة الشعبية التي جسدتها في مسلسل "ملوك الجدعنة"، قالت: "طبعا مش حقدر أجيب من خيالي، لازم أكون شوفت وعاشرت، وطول عمري بركز قوي مع الناس ؛مش أي دور بنت شعبية أو عايشة في حارة يبقوا شبه بعض، فاتن في ملوك الجدعنة مختلفة عن شخصية شعبية عملتها في حاجات تانية زي طرف ثالث أو فتاة المصنع."

قالت ياسمين رئيس: "دايما بقول أنا مش عايزة أحس إن مهنتي ممثلة، عايزة أحس إن أنا بمارس هوايتي، ودايما بقول لهم يا جماعة أنا ست بيت وبعدين ممثلة، مهنتي الأصلية ست بيت وأم ؛ شخصيتي مكانتش كده الأول، وبحس كل فترة الواحد تفكيره بيتغير، بحس كل خمس سنين مثلا بتغير وتفكيري بيتغير."

يذكر أن ياسمين رئيس عرض لها عبر منصة "شاهد" حكاية "ياسمين" في مسلسل "60 دقيقة" من بطولتها، وحقق نجاحا كبيرا لاختلافه وتناوله موضوعات مثيرة بأبعاد نفسية.