ريهام سعيد ترد على كلام حسن شاكوش ضدها

ردت الإعلامية ريهام سعيد على مطرب المهرجانات حسن شاكوش، بسبب الخلاف الناشب بينهما عقب الاختلاف على حفل كان من المقرر أن يحيه المطرب في حفل تخرج أبنائها

وقالت ريهام من خلال بث مباشر لها عبر حسابها على "فيسبوك": "اللايف ده اتأخر شوية، ومكانش ينفع أعمله، لأنها غلطة إني أرد عليه، لأني أكبر بكتير أوي أوي أوي، بس الناس شخصيات، فيه ناس مبتردش، وفيه ناس تاخدها في كرامتها ومترتاحش إلا لما ترد، وأنا النهاردة من واجبي كـ أم برد".

وتابعت "اللايف ده لـ حسن شاكوش، وأنا مش بغلط في حد وبعرف أخد حقي كويس جدًا بالقانون، وربنا بيجيبلي حقي، وأنا بـ 60 راجل ومباخفش، شاكوش كان طالب 30 ألف، وقلتله حرام في 5 دقايق، ووصلنا لـ 11 و11 ألف ونص، ولما جيه مرديش ينزل من العربية ومدير أعماله قال مش هيمشي على رجليه".

وعن ردها على حديثه عنها، قالت: "أنا عارفة إن فيه واحدة زقته، ونصيحة مني يا شاكوش متخليش حد يزوقك على حد عشان الدنيا دوارة وممكن تلف ويتعمل معاك كدة، واللي مالكش معاه مصلحة النهاردة هيكون ليك معاه مصلحة بعدين، وأنا شايفاك حد غلبان وتم استعمالك غلط".

وأضافت "متطلعش تتكلم على أعراض ناس عيب في أصول، اطلع كدبني، أو قول مبحبهاش، متطلعش تقول أنا شفت حاجات مينفعش أجيب سيرتها أو أتكلم عنها، وهي  الحاجات اللي شفتها دي أكتر من الحاجات اللي بتشوفها في الأماكن اللي بتغني فيها".

واختتمت: "غلطت في أهلي وشرفي وعيالي اللي بتقول شفت حاجات مش عارفة إيه أنت متحلمش تسلم على عيالي لأنهم ناس محترمة جدا، وعيب الشهرة تغيرك".