القصة الكاملة لأزمة شقيقة احمد السقا ومها احمد بسبب مسلسل نسل الأغراب

هاجمت الفنانة مها أحمد زميلها الفنان أحمد السقا بطريقة غير مباشرة عبر حسابها الشخصي بموقع التواصل الاجتماعي "فيس بوك".

وقالت مها: "عوضي على الله دي الجملة اللي ديما بقولها، لما أتصدم في أشخاص، الحكاية يا سادة عن نجمين عملوا مسلسل وأتنجمت عليهم بنوتة لسه ألف باء تمثيل وأديتهم علي قفاهم".

تابعت: "ركبت عليهم الى ان اصبحت بطلة المسلسل وبطلة الدعاية للمسلسل وهما راضيين رغم ان طول عمرهم مبيعملوش كده مع اى زميلة لهم اقربها انا".

أضافت: "النجم الاولانى بينى وبينه عيش وملح وزماله رشحت في مسلسل بطولته وكان بيقنعنى بدور، ولما وافقت بعتولى دور تانى معرفوش دور، متعملوش واحده مبتدئه المفروض انه عارف قيمتى الفنية".

وتابعت مها: "لكنه اتهرب منى وموقفش جنبى وباعنى رغم ان الكل عارف انى زى اخته(ندل) اما التانى كان فبداياته يتمنى يسلم عليا ويقولى يا استاذه نزلت من نفسى وقلتله مش هنشتغل مع بعض ما هى الحوجه مره".

أضافت: "رد وقالى الدور بينادى صاحبه، طبعا محكلكوش قد ايه ندمت نفسى وعشت اسود ايام حياتى عياط واكتئاب وقلت (عوضى عليك يارب).

استكملت: "تمر الايام والاتنين يعلو ويتجمعوا مع بعض في مسلسل واحد( على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعايه كامله لصالحها وهما (مخدماتيه للاستاذة)".

أضافت: يمهل ولا يهمل ابدوا من جديد يااوفر تمثيل ياللى مبتقروش ياكمبارس جنب النجمه، نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا ( عوضنا على الله ) يارب متحوجنا لحد حتى ولو كان اقرب الناس لينا.

ردت فاطمة السقا شقيقة الفنان أحمد السقا على ما قالته مها أحمد عبر فيس بوك قائلة: "الكلام ده موجه ليكى يا أستاذة بدل ما تفضلى تمسحى ردى كل شوية، ‎ابهرتينى يا مها بأخلاقك العالية وانك افتكرتى العيش والملح اللى كلتيه فى البيت بتاع الفنان اللى مش عارفة تقولى اسمه بس".

أضافت: عرفتى تقولى عليه "ندل" اللى هو احمد السقا، بس انا بقولك قدام الناس قطع لسان اى حد يقول عليه كده لانه راجل اكرمك ووقف جنبك انتى و مجدى بدل المرة ألف.

وتابعت فاطمة: "وامير كراره بردو راجل جدع ومحترم للى ما يعرفهوش فى البوست بتاعك ده، معرفش ايه الفرص اللى كانت عندك اللى كان يتمنى يشتغل معاكى فيها زمان بس هو اى حد يتمنى يشتغل معاه دلوقتى اكيد".

أضافت: "كلمة الدور بينادى صاحبه دى بتاعة افلام، ما بتتقالش فى الحقيقة، كفايا دراما وتشويه للناس، وبعدين هما كممثلين مش مطالبين يقفو جنبك ولا يجيبولك ادوار على فكرة، دى رؤية مخرج وناس بتوع كاستنج".

استكملت: "الحقيقة انا مش عارفة انتى عايزة ايه، انا مش شايفة بعد العشرة الطويلة اللى انتى قولتى عليها غير كمية الحقد والسواد والشماتة اللى كانو متداريين ورا ابتسامة كدابة معرفش انتى ازاى كنتى بتدخلى بيوتنا الصراحة وانتى ست وحشة كده".

اختتمت: نسيت اقولك، السب والتطاول ده بيدل على الاصل، واحنا بقى ولاد ناس مع اننا عندنا كلام كتير اوى يتقال".

جدير بالذكر أن فاطمة السقا حذفت المنشور الذي كانت تهاجم فيه مها أحمد لاحقا من حسابها عبر موقع "فيس بوك".