منى زكي: صورنا "لعبة نيوتن" في أمريكا وبعدها الولاية قفلت..ولحقت آخر طيارة طالعة من لوس أنجلوس

قالت الفنانة منى زكي، خلال استضافتها في برنامج The Insider بالعربي، إن تجربة تصوير مسلسل "لعبة نيوتن" في أمريكا على مدى 16 يوما كانت حلوة جدا ومرهقة جدا، ولم يشعروا بسبب التصوير والعمل اليومي بأن الولاية أغلقت مع جائحة كورونا.

تجسد منى زكي في "لعبة نيوتن"، المقرر عرضه في الموسم الرمضاني 2021، شخصية المهندسة الزراعية "هنا سالم السيد"، وعن ملامح الخوف التي ظهرت عليها في برومو المسلسل، قالت "أحيانا ستات كتير من كتر الكلام وتربيتهم يتربى جواهم خوف، وفي ناس بتمرض ويجيلها أمراض نفسية حقيقية.

 هي شخصية عندها خوف كبير، وفي صراع بين الثلاثي هي ومحمد ممدوح ومحمد فراج".

وعن مغزى اسم المسلسل، قالت: "جاي من إن لكل فعل رد فعل أقوى منه، وده الّي بيحصل فعلا في الأحداث. إزاي كل واحد بيمشي بدماغه، وأحيانا رد فعله يبقى أقوى من الّي حصل."

وأضافت: "قبل ما نمشي بيوم قررنا ننزل كل واحد يشتري هو عايز إيه، اكتشفنا كل حاجة قافلة في الولاية الّي إحنا فيها، وماكناش حاسين من كتر التصوير والشغل كل يوم ومش متابعين أي حاجة. واكتشفت إن طيارتي كانت آخر طيارة طالعة من لوس أنجلوس قبل الإغلاق الكبير."