محمد منير في تصريح مفاجئ: مستعد أتزوج من أي مطلقة والكورونا عقاب إلاهي

في تصريح مفاجىء له، كشف النجم محمد منير عن استعداده للزواج من أي فتاة مطلقة، مؤكدًا أنه يعيش دومًا في قصص الحب، ولكن لا يعلن عنها احترامًا لخصوصية الطرف الثاني.

حديث منير جاء خلال مداخلة هاتفية نادرة مع الإعلامية لميس الحديدي ببرنامج "كلمة أخيرة"، ورد مازحًا على سؤال حول سبب عدم تكرار تجربة الزواج، قائلًا:" بلاش يا لميس السؤال ده؟  لأني كل يوم بتنقل من قلب لقلب علشان كده خايف على الأجيال الجديدة علشان الطلاق بيحصل بسرعة الأولاد بيشوفوا البنات في الصيف "بالمايوه" وفي الشتا يطلق عشان كده البنات بتتطلق كتير". وأضاف: أي بنت مطلقة أنا جاهز للجواز.

 
وتحدث منير للمرة الأولى عن الجدل المثار حول حفلاته المرتقبة في فلسطين وهل سيدخل بتأشيرة من قوات الاحتلال، وقال: "اتعرض عليا حفلة في فلسطين، والموضوع تحت الدراسة لأني لو فكرت أروح إسرائيل يبقي لازم أروح غزة وأروح المناطق الفلسطينية .. وأنا فنان والفن ليس له وطن".

 وتابع: "أنا بغني بقالي 42 سنة، والناس كلها بتحبني، ووحشتني الحفلات أوي أوي أوي".

 وواصل حديثه قائلًا:" أسمع من الأجيال الحالية عمرو دياب، وعلى الحجار وبسمع مهرجانات، والمهرجانات مش وحشة، وفيه فن كويس وفن وحش."

 ووصف منير انتشار جائحة كورونا بالعقاب الإلهي، وقال: "واضح إننا أغضبنا ربنا في العالم كله وأتذكر فيلسوف ألماني كان بيكلمني منذ قريب وبيقلي إن كورونا دي لعنة والكمبيوتر برضه وده رأيه مش رأيي بس أنا بأيده، وأنا عايش في ألمانيا من سنة 1991 عشان  كده سر علاقتي بيهم إني كل ما بسافر بسافر بباسبور مصري وبرجع برضه بباسبور مصري فيبقى الوطن الأول هو مصر والوطن الثاني هو ألمانيا.
وأضاف: ومحدش بينسى مصر بلده أبدا وعشان كده أنا بعتب على الأجيال الجديدة  في الفكرة دي ولسه منذ فترة كان بيكلمني تلميذي ليا ألماني كان المدير الإعلامي لنادي بايرن ميونخ وماسك منصب كبير زي عدلي القيعي ومحمود الخطيب.

 وحول ألبومه الجديد "باب الجمال" الذي طرح منه ثلاث أغنيات، علق قائلًا: طبيعة الإنتاج تغيرت بعد عصر الكاسيت ودلوقتي مع تطور العصر بقي فيه الإنترنت لكن مع ذلك الحرامية منتشرين على الإنترنت لكن في النهاية هو موضة الزمن عشان كده المنتج بيضطر يسرسب الأغاني كل أسبوعين وكل شهر وهكذا".

 وردا على سؤال حول الأغنية الأقرب على قلبه قال: مافيش ألبوم في حياتي نزلته إلا وحبيته مافيش حاجة في حياتي بعملها إلا عن طريق الحب في كل علاقتنا، هرد بنفس الإجابة وأقول هي الأغنية اللي لسه انتوا مسمعتوهاش اللي هي لسه عندي في السر وطالما المنصف الفني نزل السوق  فخلاص علاقتي بتنقطع بالأغنية بفكر بعدها في الجديد والجديد مليان.