ريهام سعيد تعتذر وتتعهد "مش حغلط تاني"

نشرت الإعلامية ريهام سعيد بيانا طويلا عبر حسابها بموقع إنستقرام، تقدمت فيه بالاعتذار عن كل ما حدث في حلقة صيد الثعالب ووعدت جمهورها بأنها لن تقع في أخطاء مماثلة مرة أخرى، ورغم الاعتذار ستبقى عودة ريهام رهن موافقة جهة أخرى وهي نقابة الإعلاميين، التزاما بقرار المجلس الأعلى للإعلام في مصر برهن عودة برنامجها "صبايا الخير" بتقديم اعتذار من جمهورها.

ريهام سعيد، نشرت صورة جديدة لها، عبر حسابها بموقع انستقرام، وعلقت عليها ببيان اعتذار طويل عن الحلقة السابقة لها من برنامج "صبايا الخير"، والتي تسببت في إيقاف البرنامج مجددا، قالت فيه: على قد ما زعلت إني اتهاجمت واتجرحت كتير فرحت اوي ان ناس كتير بقت رحيمه بالحيوانات حتى لو مفترسه وخطر علي البني ادم.

أضافت: انا بعتذر على اي مشهد في اساءه لأي حد وخصوصا الناس المهتمة بالرفق بالحيوان، بعتذر إني تسببت في اي الم لأي حد فيكوا لكن لازم تكونوا متأكدين ان اشتغلت واجتهدت وتعبت لمده ١٨ سنه واكيد مش محتاجة اي شهره ولا مشاهده، الهدف الوحيد هو تقديم محتوي محترم صادق ومفيد.

​

تابعت قائلة: كنت عايزه أسلط الضوء على مهنه الصيد الي موجودة في كل انحاء العالم بمميزاتها وعيوبها حبيت أقدم الحقيقة وازود معلومة جديده لان هي دي نيتي بس انا مش بشتغل في مهنه الصيد ولا يمارسها لكن هي موجودة .. اي اتهامات انا هارد عليها الحلقة الجايه لكن المهم دلوقتي ان محدش يزعل مني لان اكيد كل الي اتقال ده مش حقيقة.

وواصلت اعتذارها قائلة: انا عايزه اعيش في سلام وكفاية مشاكل. نفسي الي بيهاجموا وعمرهم ما اتفرجوا على البرنامج يبتدوا يتابعوا يمكن تشوفوا اد ايه بنتعب واد ايه حريصين ان احنا نقدم أحسن حاجه. انا اسفه مره تانيه والمرة الي جايه هاحط في الاعتبار ان ساعات الحقيقة ممكن تجرح بس طلب اخير لما تلاقوا غلط انصحوا وصلحوا وماتجرحوش لان اكيد الي رحيم بالحيوان هايكون اكيد رحيم بالبني ادم الي هو ربنا حطه في اعلي مرتبه.

اختتمت بيانها بقولها: انا انسانه واكيد الحكم عليه انا وعيلتي بالإعدام كل شويه مش عدل خصوصا ان طول الوقت في سوء تفاهم ولكن بيكبر نتيجة المشاهدة العالية. بتعرض لهجوم واساءه رهيبة من غير ما حد حتى يعمل اعتبار لأولادي او امي. من دلوقتي لازم نفهم اد ايه احنا بنتشاف ولازم نكون اد المسؤولية وحتى لو لينا اعداء متربصين. امشي عدل يحتار عدوك فيك. وعد مش هانغلط تاني سامحوني.

يذكر ان المجلس العلى للإعلام في مصر أصدر بيانًا كشف فيه تفاصيل التحقيقات بشأن برنامج "صبايا الخير" والإعلامية ريهام سعيد، بعد أن تقرر إيقاف البرنامج بعد حلقة صيد الثعالب.

وقال المجلس في بيانه، إن التحقيقات انتهت اليوم، ولا مانع لدى المجلس من إعادة بث البرنامج، وذلك في ضوء التعهد المقدم من مقدمة البرنامج بالاعتذار للجمهور في أولى حلقاته بعد إعادة البث عما تم التحقيق بشأنه، ويشرط إنهاء أي موضوعات متعلقة بنقابة الإعلاميين.