أحمد السعدني لطليقته: حبيبة عمري رحلت وتركت لي الأولاد والندم
كتب الفنان أحمد السعدني رسالة مؤثرة لطليقته السيدة أمل سليمان التي رحلت مساء الجمعة، تحدث خلالها عن حبه لها وندمه على فقدانها وحسرته على خسارتها، بالرغم من أن السعدني نادرًا ما يتحدث عن حياته الخاصة.
وجاء في رسالة أحمد السعدني:
"عمري في حياتي ما اتكلمت عن حياتي الشخصيه لكن حسيت اني لازم اعمل كده دلوقتي
فذكر إن الذكري تنفع (المؤمنين)
او الكافرين او المستهبلين او تنفع اي حد ححس اني عملت حاجه
ححاول مطولش يوم ٩/٩/٢٠٠٣ حب من اول نظره في الشارع ما بين معهد السينما حيث كانت تدرس و معهد فنون مسرحيه حيث كنت الهو و ادرس برضه ميضرش كنت راكب عربيه و كانت ماشيه علي رجلها كنت حخبطها لكن حصل خير لا محصلش قوي خبطتتي هي في قلبي حب تقطيع شرايين سنه خطوبه سنه كتب كتاب شهر جواز خلفه اول ولد هنا بدأت المشكله اللي بكتب الكلام ده عشانها
انا زي كتير للاسف شباب anti تحمل مسئوليه بص لنسب الطلاق و انت تفهم انا بيجيلي ارتيكريه لما احس اني مسئول و هي برضه حبيبتي زي بنات كتير بتقول طلقني اكتر مبتنطق اسمي كانت النتيجه في اول سنه بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالي يا عم طبق الشروط ادي اول طلقه
قشطه يا باشا عشت حياتك ؟ اه ...ارتحت ؟؟ لا
وحشتني وحشني حنيتها و حبها و هبلها متيجي نرجع يا بت يالا يا متخلف هوووووب جبنا تاني ولد نفس الاحساس نفس الارتكريه بس المرادي صموووووود مش حينفع نتطلق تاني لا تصدق نفعت الجانب الاناني في شخصيتي غلبني يا عم كبر مخك و عيش حياتك المشكله اني عمري مارتحت كنت عايز حضنها و حنيتها و هبلها بس كنت بأجل الرجوع يمكن اكبر او اعقل او اقدر اتحمل المسئوليه بجد حددت لنفسي سن معين ارجعلها فيه قال يعني حبقي نضجت بس ملحقتش
ماتت في لحظه كانت بتكلمني قبلها بساعه و مكنتش عيانه كان عندها ضغط زي اغلب الشعب المصري الحمد لله
ماتت و مشيت و قررت تسبني للابد كنت فاكرها حتستناني و متاكد من ده مستحيل تحب حد غيري مجاش في بالي انها ممكن تموت دلوقتي صغيره و اكتر واحده في حياتي شفتها بتحب الحياه و عندها طاقة ايجابيه
ماتت و سابتلي الولدين و الندم
انا متاكد انك في الجنه رحتي للي خلقك يوم عرفه و اميره و ست البنات و الستات و نضيفه و كريمه و صنتي ولادي و بيتي
بحبك يا امل حياتي اللي اتهد و بوعدك المرادي حشيل المسئوليه للاسف اتعلمت الدرس بس بعد ما اتحرمت من حنيتك و حضنك و ولادك كمان اتحرموا من احن ام ربنا يقدرني و اربيهم احسن ما كنتي عايزه بحبك و مش بطلب منك غير انك تسامحيني
ربنا يرحمك و يرحمني و يرحم ولادنا يا حبيبة عمري الوحيده".
وكانت المهندسة أمل سليمان طليقة الفنان أحمد السعدني، وأم أولاده، قد توفيت مساء أمس الجمعة، وحصلت الوفاة بسبب تعرضها لأزمة قلبية حادة نُقلت على إثرها إلى المستشفى، قبل أن تلفظ أنفاسها الأخيرة هناك.
وقد تلقى السعدني الخبر الصادم أثناء توجهه لحضور حفل جنيفر لوبيز في الساحل الشمالي حيث يتواجد هناك لقضاء عطلته الصيفية، وغادر الحفل عائدا إلى مصر على الفور، وأصيب بانهيار تام فور التأكد من الخبر، وظل يبكي بعد القاء النظرة الأخيرة على طليقته وأم طفليه، وأعلن أنه لن يفارق جثمانها وسيظل بجوارها داخل المستشفى لحين انتهاء مراسم الصلاة عليها.
يذكر أن أحمد السعدني رفض التعليق سابقا على أنباء انفصاله عن زوجته وأم طفليه "للمرة الثالثة"، مؤكدًّا أنّه تعلّم من والده الفنان القدير صلاح السعدني، ضرورة صون حياته الخاصة، وإبعادها عن الإعلام، بخاصّة وأنّ لديه أطفالًا، علمًا بأنّ السعدني طلّق زوجته مرة واحدة، وتدخّل والده وقتها لإصلاح الأمور من أجل طفلهما الوحيد عبد الله، وعادت المياه إلى مجاريها وأنجبا الطفل الثاني "ياسين"، وتردد أنّ الطلاق الثالث تمّ سرًّا ولكنه حسم الخبر وأعلن الطلاق رسميا خلال استضافته مع الإعلامية إنجي علي في برنامجها المذاع على راديو إف إم.
أضف تعليقا