سلاف فواخرجي تخرج عن صمتها وتتحدث عن تفاصيل موت شقيقتها المأساوي

قبل أشهر، توفيت نهى شقيقة الفنانة سلاف فواخرجي بعد صراع مع المرض، وفي ذكرى ميلادها الذي يمرّ للمرة الأولى بعد وفاتها، استعادت سلاف شريط ذكريات، لتروي للمرّة الأولى لحظات مؤلمة عاشتها عندما لفظت أختها أنفاسها الأخيرة.

"متل اليوم السنة الماضية، ما نمت بالليل وسافرت وش الصبح عاللاذقية لعيدك بعيد ميلادك، ميلادك وميلادي اللي كنا نعتبرهم انت وانا ايام مقدسة بشهر تموز العظيم، وكنا نقعد نحكي عن ميزاتنا الرائعة وعن برج الأسد، مع انه لا انت ولا انا منفهم بالأبراج ، المهم نمدح حالنا ونذكر بعض بمآثرنا ... ونضحك... كنتِ متل القمر متل عادتك ، وقوية رغم ضعفك، وعم تضحكي رغم حزنك متل عادتك كمان ... كان صرلك زمان ماعم تاكلي ، بس لأنو انا اجيت و بتعرفيني بحب الفطور ما خجلتيني وفطرنا سوا ...  ضميتك وبوستك وحطيت ايدي ع وجهك، وانت عم تقليلي هالحبتين اللي طلعولي أثروا على جمالي ... قلتلك بكرة بيروحوا ... وفعلا راحوا ... لما انت رحتي بين ايدي راحوا ... ".

اقرئي أيضًا: شكران مرتجى: أقول لسلاف فواخرجي ليتك كنت في حياتي من زمان

وتابعت سلاف " كمان يوم اللي رحتي كنتي قمر وما تغيرتي عليي ، الشي الوحيد اللي كان مختلف هو عيونك اللي عم تدمع مع الضحكة، وعم تطلع فيني وتقلي بدون حكي انقذيني ... وقلبي عم يتقطع وانا ما عم اقدر اعمل شي ... حضروني الاطبا نفسيًّا قبل فترة للخبر، وقبل اسبوع وقبل يومين ، وبدأ العد التنازلي لألمك والعد التصاعدي لوجعي ... وقبل اليومين ما يخلصوا ، اجيت بدي روح عالبيت جنب المشفى شي ساعة وارجع ، في شي خلاني ما روح ، ما قدرت ، اشتقتلك ... فجأة اشتقتلك ... مع اني كنت جنبك ...قربت لعندك وضميتك كتير ، سقيتك آخر شفة مي ، ورحت شعلت بخور من دير صيدنايا كان باعتلي ياه رفيقي سعيد خصوصي مشانك بعرفك بتحبيه ، وكنت عم استنى لتفيقي لقلك شو وصلني من الدير وبعرف قديش رح تفرحي وتتفاءلي واعطيكي المنديل اللي عليه العدرا اللي ما كنتي ترتاحي الا لما تشوفيها واللي بقيت مرافقتك ورفيقتك ...بس، ما فقتي ... لمست وجهك اللي بحبه نفس اللمسة تبع يوم ميلادك ومسحته بزيت الدير ، ومسحت عيونك ورقبتك وجبينك وشعراتك ، وعلى قد ماكنتي حلوة صرتي احلى ... ".

اقرئي أيضًا: سلاف فواخرجي ووائل رمضان يحتفلان بابنهما الدكتور حمزة

وختمت سلاف قائلة " ووشوشتك وقلتلك راحوا الحبتين اللي مدايقينك ، واطمني مارح خلي حدا يشوفك الا بأحلى صورة متل ما انتي بتحبي يا أجمل بنت باللاذقية كلها ... قلتلك بحبك قمتي ضحكتي ولمعت دمعة بطرف عينك ، كانت اخر دمعة ... وشديتي ع ايديي ... وكانت اخر شدة ... يومها كان آخر كل شي ... بس انت دايما عندي أول شي ... وبعرف اني بقلبك اول شي ... كل عيد ميلاد وانت أقرب مني إلي ... و اشتقتلك ... كتير اشتقتلك ... الله يرحمك نهى ...أختي  ".